今日有點不快,原先諗住拿10筒菲林(5正5負)去沖+scan,點知今日去咗之前去開荷蘭園間創意,唔知係執咗定搬咗,間鋪變咗間賣衫嘅,咁我就去埋雅廉房哥間分店,結果都係一樣,請問有無人知佢係執咗定搬咗呀?
結果我拿咗啲菲林去龍影到沖(我係第一次幫襯,聽人講佢地沖啲菲林幾好手勢),因為我係個lomography愛好者,想拿啲正片e to c,但係佢地話無呢個服務,話咁樣係沖壞咗啲菲林,唔幫我沖,咁我就無奈地擺低咗啲負片沖+scan,但一問之下,沖菲林一筒$12(非常合理嘅價錢),scan入CD一筒$30,但係scan係逐筒計,所以我沖5筒總共$210大元(我即刻O咗嘴,咁貴嘅,我以前喺創意度沖+scan都係$20+$10,但係創意係十筒菲林scan入一隻CD都係收$10),所以我最後都係淨沖無scan。
之後我又去咗聖心對面哥間(間鋪唔知叫乜名)諗住拿啲正片去e to c,我都係第一次幫襯佢地,入去同個服務員講話我想咁沖得唔得,佢話可以,價錢係一筒$30,5筒就$150,因為我想快啲睇嚇呢間鋪沖嘅e to c啱唔啱心水,所以我決定scan埋佢。
我想問嚇咁多位,你地去沖菲林嘅鋪頭係咪scan入CD都係逐筒計,有無好似創意咁,淨係計一隻CD錢?有嘅話請告知,如果間間都係咁嘅話,我真係真心覺得創意無咗好悲哀!
仲有一問,仲有邊間可以沖正片e to c?